మైనర్ బాలికపై అత్యాచారం కేసులో ఆధ్యాత్మిక గురువు ఆశారాం బాపూపై జోథ్‌పూర్ ఎస్సీ, ఎస్టీ కోర్టు ఈనెల 25న తీర్పు వెలువరించనుంది. ఆశారాంబాపూ గురువుగా మారడం వెనుక ఆసక్తికర కథనం ఉంది. ఇతని పూర్వీకులు పాకిస్తాన్‌లోని సింధ్ ప్రాంతానికి చెందినవారు. ఆశారాం అసలు పేరు అసుమల్ థావుమల్ హర్పలానీ. దేశ విభజన అనంతరం వారి పూర్వీకులు అహ్మదాబాద్‌లో నివాసం ఏర్పాటు చేసుకున్నారు. ఆశారాంబాపూ ఆత్మకథ పుస్తకాన్ని అనుసరించి ఆయన మూడవ తరగతివరకే చదువుకున్నారు. తండ్రి చనిపోయాక విద్యకు దూరమై బొగ్గు వ్యాపారం చేశారు. అయితే ఆ వ్యాపారం అతనికి నచ్చలేదు. తన 15 వ ఏట ఇంటిని విడిచిపెట్టి ఒక ఆశ్రమానికి చేరుకున్నారు. పెళ్లి నిశ్చయమైన 8 రోజులకు మందు ఆశ్రమానికి వచ్చేశారు. అయితే తరువాత అతనికి వివాహం జరిగింది. లీలాషా అనే గురువు నుంచి ఆశారాం దీక్ష తీసుకున్నారు. అప్పడే అతని పేరు ఆశారాంబాపూగా మారింది. మీడియాకు తెలిసిన వివరాల ప్రకారం ఆశారాంబాపూ మొత్తం 400 ట్రస్టులను ఏర్పాటు చేశారు. కాగా మైనర్ బాలికపై అత్యాచారం కేసులో చిక్కుకున్నఆశారాంబాపూ 2013 నుంచి జైలులో ఉంటున్నారు.
